شهر الوجع

تشرين يا شهر الوجع شهر الغضب ... وقلة الايمان
بأوّلك تشرين نهر الموت
حفر الشهادي ع صخرتو عنوان
وب 13 منك غاب الوطن عن هالوطن
وغابت الانسانية عن الانسان!

تشرين يا شهر الوجع شهر الكرامة والشرف والعنفوان
عندك نهينا حدود الأنا ورسمنا حدود الوطن ... "لبنان"
بقينا على مفارقك نحفر بحبر الأمل.... "راجع" ...
بقدرة شعب عطشان للحريّة أو جوعان
شعب صامد مش خايف من الذلّ ومن الموت مش سئلان
طاحش يحرر هالأرض اللي بترابها كاسو ممرمغ ومليان
ومن دم تراباتها يشرب قهر حتى صار من قهرها سكران!

هالجوع شو اسمو؟ أو هالعطش؟ إدمان؟!!!

إدمان ع وطن موجوع متل الطفل ممغوص
ومش عارف ان كان بردان أو دفيان
إدمان ع وطن مجنون عم يصرخ "أنا تعبان"
إدمان ع وطن مفجوع مجبول ترابو بدم
وعم ينباع للنسيان....

تشرين دمك دم الوفا كحل للعين
دمك دم التضحية زينة جبين الزمان
لولا رح تكفّر كل العمر وتحفر دمع
وتزعق بأعلى صوت: "أنا ندمان"
بدك عمر تاني ويمكن ما يكفّي
ويمكن حتى ما يمنحك غفران....
ولولا بتسأل ليش هالأسى كلو
رح ذكرك لو كنت للذاكرة فقدان
"داني" البطل هاك النمر شو الغيبو
مش انت خدتو مع كل هالخدتن كمان؟؟؟!!!

تشرين كل سنة كنا نذكرك شهر الوجع والتجربة والامتحان
تشرين كل سنة كنا ننكزك بركي بيوعا ضميرك المتغطرس الغفيان
واليوم تشرين صرنا ننطر رجعتك الحاملة مع دموعا رجعة الفرسان
والسبب واضح وضوح نور الشمس ما بدو شرح ... وبسلامة الفهمان
السفينة الغابت عن المينا 15 سنة وأخدت ع غير مينا بواسل وشجعان
رجعت تهز ضميرك الباع الوطن وعاش بنعيم ع غيبة القبطان
وتقلك بصوت يرقص للوجع ويضحكلوا من قلب بالنصر مليان:
شهدا تشرين اليوم عم يتسللوا من خلف بردايتك تيحرسوا الميدان
اللي فيه ياما الكفّار تدللوا وافتكروا واتكهنوا انو الكفر نعمة من الديّان
رح يموتوا من الصدمة بس يعرفوا انو الربّ صاحي ومش غفلان
وتولع الأرض نار تحتهن لو اكتشفوا انو حقيقهم لعنة من الشيطان!

ذكرى تشرين اليوم انت مكرسة تتدوسي بجزمتك رقبة الطغيان
انت اليوم ذكرى للدوام مقدسة
ولولا خسرنا الدني كل الدني
المهم ربحنا المجد لاسم لبنان!!!

رولا أحوش 11.10.2006

في جريدة السفير

في صفحة التيار