توقيع كتاب شفة غزل 3.12.16

من هون
من ارض الحلم
من قلب الوجع
من وجع هالكون
لا تسأل عن ورد
لا تسأل عن اللون
من هون
بتسأل الخالق
عن عدد النجوم
واديش حاملي هموم
بتسأل القديس
عن عدد الشموع
وقديش حاملي دموع
ع ابنها الموجوع
من هون
ما فيك تحكي 
وتسبق الازمان
وتقول بركي
بينمحى النسيان
وتحمل عصا العميان
من هون
رح تبدا الحكايي
وترسم الا نهاية
من ارض 
كتب عنها الحب
شي مية روايي
من هون
من بلد ارز الرب
الموجوع صرلو سنين
من خد وج الشرق
العم ينطر الحلوين
وتنده الو جايي
من هون
رح تصرخ هالدني
للرب وتقلو
اعطيني شي كم سني
اعطيني العمر كلو
ت يوعي هالانسان
وعليك ت دلو
وارسم زهر نيسان
عجبين ارض الحلم
عجبين ارض لبنان...
مسا الحب مسا الجمال مسا الغزل مسا الكلمة مسا الحرف مسا الورقة والقلم مساكن مسا الخير
كيف ما مسيتكن بكون عم بحكي شعر، بالشعر فينا نجمع ىكل التناقضات: الحب والكره، الفرح والحزن، الراحة والتعب، بالشعر فينا نجمع قلوب وفينا نفرق قلوب والدليل انو نحنا اليوم مجموعين كل واحد من مطرح تحت سقف واحد سقف الطفولة والايام الحلوة سقف المؤسسة اللبنانية الحديثة

اسمحولي بداية اشكر بيي السماوي على هالنعمة يللي عاطيني ياها والموهبة اللي زارعها فيي ... خلوني خبركم انو صاحب هالموهبة موهبة الشعر بيكون فنان كتير حساس وانو هيدا الاحساس بيتعب صاحبو كتير بس بيفرح كل اللي حواليه وهيدا هو الاهم....

وبدي اشكر بيي اللي بالسما واللي اكيد روحو موجودة معنا اليوم، شايفني وسامعني وانا هيك بآمن وبدي قلو:
انا بشكرك على هالارث اللي عطيتني ياه، انت كمان جواتك كان في شاعر، انت كنت تقول زجل وتكتب شعر وورتتني هيدا الشي، بشكرك وبهديك الكتاب ، انا اليوم حققت حلمي فيك وحلمك فيي وبهديك كل كلمة كتبتها ورح اكتبها وبقلك اني كتير كتير ... اشتقتلك!
شكر خاص وكبير للمؤسسة اللبنانية الحديثة اللي استقبلتني على مقاعدها من انا وعمري 5 سنين وبعدا لليوم فاتحتلي بوابها الي ولعيلتي ولكل يللي بحبن
مدرسة استثنائية بمدرائها وموظفينها واساتذتها وتلاميذها
بدي اشكر استاذ مارون خليفة واستاذ منير عفيش لكل اللي عم يقدموه لكل تلميذ مرق ورح يمرق بتاريخ هالمؤسسة من تعب وسهر تيوصلو التلميذ للمستوى المطلوب بالحياة تتصير هالمؤسسة اكثر ما يليق بضيعة حلوي متل ضيعتي الفنار
خلوني خبركن ليش استثنائية؟
من حوالي 8 سنين يعني كان صرلي 12 سنة تاركي المدرسة كتبت مقالة بالجريدة بعنوان "لبنان ان بكى" فمستحيل انسى كيف رن تلفون البيت وكان استاذ مارون خليفة عم يتصل يهنيني لما قرأ المقالة وهيدا الشي ما بيصير الا هون مع اساتذة كبار متلكن

بدي قول لاستاذ منير عفيش انو صحيح ta petite roula كبرت بس متل ما سبق وقلتلك انا قدام عظمة شعلة ورسالة العلم اللي حملينها بضل صغيرة وصغيرة كتير
استاذ منير عفيش البي الحاضن والحاضر تيغمر بعطفو كل التلاميذ الله يخليك بصحتك انت واستاذ مارون وتقودو هالسفينة بحزم وقوة وتوصلو دايما فيها على بر العلم الصحيح وتسلمو هالشعلة بكل امانة من جيل لجيل
اكيد لا بد من شكر دار بيسان، بيسان للنشر والتوزيع اللي اهتموا بكل تفاصيل الكتاب من الغلاف للغلاف، انا عطيتن الشعر وهني زينوه وذوقوه تيصير يليق فيكن وبمكتباتكن
انا بتمنى انو هالكتاب الحلم "شفة غزل" اللي هو نتيجة جهد سنوات طويلة يكون فعلا عند حسن ظنكم وتشوفوه متل ما انا شايقتو بنفس الحب والشوق واللهفة -شكرا بيسان للنشر والتوزيع-
اسمحولي هني حالي وهني اللغة العربية وهني كل تلميذ تعلم اللغة العربية عند استاذ علمني سنين.. من انا وبعمر 10 سنين للمراحل الثانوية... استاذ انا بعتبر انو وجودي على مقاعد الدراسة عندو هوي نعمة اضيفت على النعم اللي عاطيني ياها الرب بالحياة
انا واثقة انو الرب مرقني كل هالسنين عندك تتكون السبب اللي رح يطلع مني كل هالشعر هيدا وكل هالمشاعر الادبية اللي الرب زارعها فيي
انت كنت الايد اللي مشتني صح بين حروف اللغة وبعدك وبتضل استاذي الجميل وبضل تلميذتك الوفية  -استاذ وديع شاهين انا بحبك كتير-
خلوني خبركم كيف هالمؤسسة استثنائية باساتذتها.... هيدا cd  الشعر اللي عم تسمعوه انا سجلتو سنة 2002 طبعا متل كل سنة على عيد المعلم قدمتلو ياه هدية لاستاذ وديع
لما كنت بعدني بالمدرسة كان استاذ وديع يكتبلي بيت شعر بخط ايدو لما يكون عم يصححلي موضوع انشاء او املاء او اي فحص خطي بس في بيتين شعر بقيو علقانين بذهني من انا وبصف الخامس ابتدائي... ساعة اكتبن وضيع الورقة واحفظن وعيدن وارجع اكتين وبعد 15 سنة سجلت ال cd وحبيت حط هالبيتين الشعر اللي مرقو بكم ثانية ضمن تسجيل مدتو 45 دقيقة تقريبا...بس هديتو الcd لاستاذ وديع بيدقلي تاني نهار وبيشكرني على اللفتة اللي عملتلو ياها وهون تأكدت انو سمع ال cd بكل تفاصيلو ... وكمان مرة بقول انو هيدا الشي ما بيصير الا هون مع اساتذة متل اساتذة المؤسسة اللبنانية الحديثة...بيتين الشعر هني:
حق تعاليك في فخر على البشر
ابحار عينيك مرقاة الى القمر
انت الخيال الذي من نسجه عبقت
روائح العطر والريحان في السحر
وانا بقلك استاذ وديع: حق تعاليكَ في فخر على البشر

الليلة ليلة عيد القديسة بربارة، انا بعرف انو كتار منكن عندن ولاد وطبعا بهالليلة بنعرف انو التنكر والاحتفالات التقليدية بالعيد هيي اساسية ببيوتنا... وبعرف كتير منيح انكن انتو جيتو اليوم تتكونو معي ويمكن في ولاد ما قدرو يحتفلو بالعيد متل ما لازم، انا بشكركم لمحبتكم ووجودكم ومجيئكم كلكن بدون استثناء من رئيس بلدية الفنار اهلا وسهلا فيك لاعضاء البلدية والمختار واساتذة وتلاميذ ولجنة الاهل واهلي واصحابي بشكركن كلكن وينعاد عليكن با رب بالصحة والخير...
شو ما قلت رح يكون قليل مقابل انكن لبيتو دعوتي الليلة ... بدي اشكر دعمكم وتشجيعكم لالي..انا ما كنت عملت هالكتاب لو ما كنتو انتو تحسسوني بقيمة الكلمة كل ما وديلكن ياها... تعليقاتكم الحلوة والمشجعة هيي يللي خلتني اتحمس لهالخطوة لولا تشجيعكم كان بقي كل هالكنز على ورق المسودة وما انتج هالمولود الشعري اللي بتمنى انو يكون على قد مستوى ذوقكم ويكون بيليق بمستوى الانسان اللي فينا لانو انا بآمن انو هيدي هيي الوزنة يللي عطاني ياها الرب وانا ما خبيتها بالعكس اشتغلت كتير تردلو ياها اضعاف واضعاف الوزنات وما كون جيت على هالحياة متل كأني ما جيت بالعكس حلو نترك بصمة كبيرة او صغيرة ما بيهم المهم ايد الرب اشتغلت وانتجت وعطيت ثمار انا عم بستمتع بتذوقها وانشالله انتو كمان تتلذذوا فيها -ثمرة شعرية ادبية اسمها: "شفة غزل"-
لما كان البعض يسألني اذا دارسة ادب عربي تبكتب شعر كنت قلن لأ انا دارسة علم نفس يصيرو يقولولي متعداية عالكار يعني؟... وبس يقرو مقالاتي بالجرايد يسألوني عاملي اعلام او علوم سياسية قلن لأ انا دارسة علم نفس يقولولي ما بيصير لازم تكوني دارسة اعلام ومعك شهادة فيها...بس مع الوقت اكتشفت انو انا كاتبة وشاعرة بالفطرة وانو الشهادة هيي مش هيدي الورقة اللي بنحطها ببرواز او باطار غالي الثمن وبنعلقها عالحيط، الشهادة هيي اللي بتنحط عالراس وبتتعلق بالقلب: شهادتي هيي انتو وبس...
وبالختام لابد ما حلي سمعكن بقصيدة واهلا وسهلا فيكم عن جديد:
من هون من هالمطرح بلش المشوار
من ضيعتي الحلوة ضيعة الاحرار
فيها خلقت وفيها كبرت وصرت
شوف حالي وقول انا بنت الفنار
من هون من هالمطرح بلش المشوار
بضيعتي مدرسي فيها انا تعلمت
وبين حيطانها وع مقاعدها درست
فيي زرعت علم ووفا فيها زرعت
واليوم عم بحصد غلال بالقنطار
من هون من هالمطرح بلش المشوار
هالمؤسسة الفيها انا لقيت حالي
من طفلي صغيرة خيالها قبالي
عم تدرس وتحلم كبيري تصير 
مستعجلي بدا تتركا بكير
مش عارفي قديش فراقها قهار
من هون من هالمطرح بلش المشوار
رجعت ع مطرحي حاملي احلام
جرح فيها العمر وما كانت تنام
كلما انكسر حلم يوعى حلم جديد
وما يئست وباصرار رسمت يوم العيد
وجيت معكن عيد الاشعار
من هون من هالمطرح بلش المشوار
وجودكن زاد عالشعر رقة وجمال
وخلا كلمة شكرا حروفها قلال
اهلي القصيدة والمدرسة حبة صلا
والاستاذ راهب ع ديرو يقلي هلا
ورؤسا ومخاتير وشعرا واصحاب
فيكن ما عاد الغزل شفي وصار
بركان يولع ويضربو الاعصار
من هون معكن انا بكمل المشوار


ليست هناك تعليقات: