التكوين

يوم ال الله نفخ بتراب هالتكوين
ما سأل  يوما انت كيف وانت مين
رسم بريشة حب صورة الانسان
وما فرق ما بين معلم ومسكين
ووصى للبشر صيادي نحنا نكون
مش تجار هيكل ولا تجار دين
ونحنا باسمو صرنا نولع حروب
بالشام ولبنان وبارض فلسطين
وصرنا نكفر ونقتل ونشرد شعوب
ونعبي من همها جيوب فجعانين
من شهوة السلطة بيوم ما رح يشبعو
بيعبدو المال وابليس مخاويين
بيكفي نغز شوك ع جبين هالمصلوب
ونطعن بخاصرتو خنجر وسكين
رب الدني بس مات ما فكر ولا قال
كرمال شو عم موت او كرمال مين
قدم حياتو هديي فدا اهل الكون
وما حط لموتو شروط ولا قوانين
بكفك يا ربي المعلم بمسمار
علم ع خد الكفر واحرقو بالنار
وع تراب ارض الشرق رد الياسمين...

رولا احوش
26.10.2015